Matthew Chaptir Fyve

1. And, seeing the thrang o’ folk, he gaed up intil a mountain; and when he was sutten-doon, his disciples gather’t aboot.
2.  And he open’t his mooth, and instructit them; and quo he:
3.  Happy the spirits that are lown and cannie: for the kingdom o’ Heeven is waitin’ for them!
4.  Happy they wha are makin their maen; for they sal fin’ comfort and peace.
5.  Happy the lowly and meek o’ the yirth: for the yirth sal be their ain haddin.
6.  Happy they whase hunger and drouth are a’ for holiness: for they sal be satisfy’t!
7.  Happy the pitifu’: for they sal win pitie theirsels!
8.  Happy the pure-heartit: for their een sal dwal upon God!
9.  Happy the makers-up o’ strife: for they sal be coontit for bairns o’ God!
10.  Happy the ill-treatit anes for the sake o’ gude: for they’se hae the kingdom o’ God!
11.  Happy sal ye be whan folk sal misca’ ye, and ill-treat ye, and say a’ things again ye wrangouslie for my sake!
12.   Joy ye, and be blythe! for yere meed is great in Heeven! for e’en sae did they to the prophets afore ye!
13. The saut o’ the yirth are ye: but gin the saut hae tint its tang, hoo’s it to be sautit? Is it no clean useless? to be cuisten oot, and trauchl’t under folks feet.
14. Ye are the warld’s licht. A toon biggit on a hill-tap is aye seen.
15.  Nor wad men licht a crusie, and pit it neath a cog, but set it up; and it gies licht to a’ the hoose.
16. So lat yere licht gang abreid among men; that seein yere gude warks they may gie God glorie.

Translated by William Wye Smith, a minister of the gospel in Scottish communities in Ontario over 100 years ago. He translated the complete New Testament.

Glossary
braid – broad
lown – quiet
cannie – gentle
een – eyes
misca – slander
crusie – small open lamp
cog – vessel for holding liquids